Նախընտրական կաշառք` օրենսդրական նախաձեռնության տեսքով

Ազգային ժողովի մի շարք ՀՀԿ-ական պատգամավորների օրենսդրական նախաձեռնութամբ, փաստորեն, 1996-ից մինչեւ 2008-ի հունվարի 1-ն ընկած ժամանակահատվածում հողի հարկի ու գույքահարկի գծով կուտակված պարտքերը ամբողջությամբ զրոյացվում են:

Օրենսդրական նախաձեռնության համաձայն, այն մարդիկ, ովքեր կվճարեն 2008, 2009 եւ 2010 թվականներին կուտակված հողի հարկի ու գույքահարկի գծով պարտքերը, կազատվեն այդ պարտքերի չվճարման համար գոյացած տույժերի ու տուգանքների վճարումից:

Այս արտոնությունները չեն տարածվում խոշոր պարտքերի վրա` հողի հարկերը եւ գույքահարկերը եւ դրանց մասով հաշվարկված տույժերը եւ տուգանքները չպետք է գերազանցեն 2 միլիոն դրամը, իսկ փոխադրամիջոցների դեպքում` 1 միլիոն դրամը:

  «Փաստորեն, սա կարեւորագույն օրենսդրական նախաձեռնություն է: Հանրապետական կուսակցության ֆրակցիան է առաջ քաշել այս հարցը: Եվ մեր մարզային այցելություններն էլ ցույց են տալիս, որ մեր գյուղացիները մշտապես բարձրացնում են այս հարցը», - կառավարության նիստում ասել է վարչապետ Տիգրան Սարգսյանը` շարունակելով. «Եվ այսօր պետությունը
այսպիսի նախաձեռնությամբ հանդես գալով` շուրջ 43 միլիարդ դրամի` տույժ-տուգանքներով, մայր գումարով, մենք փաստորեն զիջում ենք այս հարկերը գյուղատնտեսության ոլորտում: Կարծում եմ, ինքը իր մեջ պարունակելու է նաեւ նոր ներուժ` տնտեսական աճը խթանելու, որովհետեւ հարկային բեռը գյուղատնտեսության վրա էապես արդյունքում նվազելու է»:

Մեր համայնքում հողի հարկի խոշոր պարտքեր ունեցողները շատ հող ունեցողներն են, բնականաբար համայնքի համեմատաբար հարուստ սեփականատերերը, ովքեր վայելում են ամենալավ հողերը, մեքենաները,… Համոզված եմ, որ բոլոր համայնքներում նույն պատկերն է:


 Մարզային այցելություններից են խոսում... Հրավիրում եմ վարչապետ Տիգրան Սարգսյանին Գեղարքունիքի մարզի Լիճք համայնք, թող գա և ինձ ցույց տա տասը հարկատուի, ովքեր սոցիալապես վատ վիճակում լինելու պատճառով մի քանի տարվա պարտք են կուտակել: Չի կարող ցույց տալ, քանի որ ազնիվ գյուղացու քունը չի տանի և կհամաձայնեք, որ առաջին իսկ հնարավորության դեպքում կմարի պարտքերը: Ու՞մ հաշվին են զիջում այդ պարտքերը, եթե ոչ` բարեխիղճ հարկատուի, եթե ոչ նրանց, ովքեր մի բուռ հողից հազիվ օրվա հաց են քամում:

Միթե սա չի նշանակում, որ պետությունը խրախուսում է գողերին, նրանց արտոնություններ տալիս, իսկ օրվա հացի խնդրով ապրողներին օգնելու փոխարեն` բարոյապես ոչնչացնում:

Գալու են սպասված նախընտրական քարոզարշավի օրերը: Մի քանի հռետորական ճառ, և մեր հարկային արտոնություններից օգտվողները պատրաստ են` թեթևացած, պարտքերը մարված, եռանդով լեցուն…

Ուրիշ ինչպես անվանել այս օրենսդրական նախաձեռնությունը, եթե ոչ նախընտրական կաշառք օրենսդրական նախաձեռնության տեսքով:

Ես, որպես բարեխիղճ հարկատու, կոչ եմ անում իմ նմաններին հարկերը չվճարել, քանի որ հենց նույն մարդիկ կշարունակեն պարտքեր կուտակել, և վայելել «պետության» ներողամտությունը…