24.05.2012

Գայլերն ընդդեմ գյուղացու



Այսօր Մարտունու տարածաշրջանի Լուսաձոր կոչվող ամառային բնակավայրում (Մարտունի քաղաքին պատկանող յայլատեղի, առավել հայտնի Գոմեր անվանմամբ) գրանցվեց գայլերի հարձակման հերթական դեպքը։ Վերջին 10 օրվա ընթացքում սա գիշատիչների արդեն 6-րդ հարձակումն էր։





Այս անգամ գայլի (կամ` գայլերի) հարձակման թիրախը մեկ տարեկան երինջ էր: Ճիշտ է, վիրավոր կենդանուն հաջողվել էր փախչել գազանի (գազանների) ճիրաններից, բայց գայլերի հասցրած վերքերը այնպիսին էին, որ անասունը սատկեց։ Սա մարտունեցի Ավետիք Դավթյանին պատկանող արդեն երկրորդ անասունն էր, որ գայլերի զոհը դարձավ: Մայիսի 18-ին գայլերը նշված բնակավայրից մոտ 500մ հեռավորության վրա հարձակվել էին նրան պատկանող ցուլիկի վրա, մինչև տերերը վրա էին հասել` մնացել էր անասունի մարմնի կեսը։

Նշված դեպքից գրեթե կես ժամ հետո բնակավայրին ավելի մոտ տարածքից գայլը ոչխարի հոտից մի գառ է տարել: Դրանից ավելի վաղ գայլի (գայլերի) զոհ էին դարձել ևս 2 գառ։ Մայիսի 20-ին էլ գայլը հարձակվել է բնակիչներից մեկի մոզիի վրա, որը նույնպես սատկել է։ 

Բոլոր նշված դեպքերը կատարվել են օրը ցերեկով, որոշ դեպքերում` մարդկանց աչքի առաջ, ովքեր հեռվից չեն կարողացել հստակ տեսնել հարձակվելիս մեկ գայլ է եղե՞լ, թե` ոհմակ։ Ոմանք ասում են թե «տնավեր որսորդը» միայնակ գայլ է, իսկ մյուսներն էլ պնդում, որ գայլը միայնակ չի լինում, հաստատ երկուսն են կամ ավելին: Վերջին զոհի վրա մարմնի տարբեր մասերում` աջ և ձախ ազդրերին ու վզատակին բազմաթիվ վերքեր կային, ինչի հիման վրա էլ մարդիկ ենթադրում էին, որ անասունի վրա միաժամանակ առնվազն երկու գայլ են հարձակվել։

Գայլին (գայլերին) փորձել են փնտրել գյուղացիները, բայց` ապարդյուն։ Լուսաձորցիները նշում են, որ չկան որսորդներ, որպեսզի կարողանան որսալ գայլերին, իսկ Մարտունու քաղաքապետապետարանի կողմից էլ դեռ ոչ մի արձագանք չի եղել։

Մարդիկ վախեցած են, մտածում են, որ, երբ դեռ նոր են եկել յայլատեղի ու արդեն 6 անասուն են կորցրել, իսկ ինչ կլինի, երբ սկսեն դաշտ տանել փոքր հորթերին ու գառներին...

Ստացվում է , որ գյուղացին ամբողջ ձմեռ չարչարվել պահել է անասուներին, որ գարնանը «գելի բաժին դառնան»: Չէ ո՞ր այսօր գյուղացու հիմնական ապրուստի միջոցը անասնապահությունն ու հողագործությունն են. այս մասին ևս մեկ անգամ բարձրաձայնում-հիշեցնում են հուսահատ յայլավորները` ցավով մատնանշելով իրենց անպաշտպան վիճակը...
Սոված գիշատիչների հարձակման լուսաձորյան քրոնիկոնը` Եղիազար Դավթյանի

Комментариев нет:

Отправить комментарий