Բաց նամակ ՀՀ կառավարությանը

Գեղարքունիքի մարզի Լիճք գյուղի «Կալեր» թաղամասը ձևավորվել է 1985 թվականին՝ զուրկ ամենատարրական կոմունիկացիաներից: Սակայն նորաստեղծ թաղամասի բնակիչներն իրենց ուժերով և իրենց իսկ ձեռքերով ջրագծեր անցկացրեցին, թաղամասը գազիֆիկացրեցին, փայտյա հենասյուներ տեղադրեցին ու էլեկտրական հոսանք ունեցան… Տարիների ընթացքում գազի խողովակաշարերն ու ջրագծերը կարգավորվեցին, բնակչությանն առանց վնաս տալու ծառայում են, ինչը չես կարող ասել էլցանցի մասին: Թաղամասը սպասարկող մեկ տրանսֆորմատորը (400 կվ) սպասարկում է և ազգաբնակչությանը, և արտադրական ձեռնարկությունների (Քար մշակող ձեռնարկություններ, մեծ խանութներ):

ՀՀ նախագահի նախորդ ընտրություններից առաջ «Կալեր» թաղամասի 63 ընտանիքների ստորագրությամբ թաղամասում նոր տրանսֆորմատոր տեղադրելու խնդրանքով նամակ ուղարկվեց գործող նախագահին, որից անմիջապես հետո տարածաշրջանային ու մարզային մի շարք կառույցներ «իրար անցան»՝ ձևացնելով, թե բավարարում են բնակչության պահանջները, սակայն ընտրություններն ավարտվեցին, ու ավարտվեցին նաև նրանց հետաքրքրությունները…

Էլեկտրոտեխնիկայի այս դարում թաղամասի էլեկտրագծերում լարումը չի գերազանցում 110-140 վոլտը… Քանի- քանի համակարգիչ, հեռուստացույց ու սառնարան է շարքից դուրս եկել, իսկ ժամանակակից ջեռուցման սարքերի շահագործման համար մարդիկ փնտրտուքի մեջ են՝ հոսանքի կարգավորիչներ «ստաբիլիզատորներ», ճարելու համար…

Պարոնայք իշխանավորներ, եթե մենք թեկուզ 10 օրով ուշացնենք էլեկտրական հոսանքի վարձը վճարել, մեր հոսանքն անհապաղ կանջատվի, իսկ ով է փոխհատուցելու մեր իրական նյութական վնասները, ո՞վ է պատասխան տալու մեր խախտված իրավունքների համար…
Նորմալ ե՞ք համարում այն հանգամանքը, որ բավարար լուսավորություն ստանալու համար ստիպված ենք լինում կրկնակի, եռակի անգամ հզոր էլեկտրական լամպեր օգտագործել…

Մենք դիմում ենք Ձեզ, որովհետև մեր տեղական ինքնակառավարման մարմինը դեռ չի կայացել ու անտարբեր է մեր հոգսերին…

Լիճք գյուղի «Կալեր» թաղամասի բնակիչների անունից` Արմեն Հոխիկյան
Հեռ. (099) 666846
Էլ. փոստ. armhox@gmail.com