«Յուրաքանչյուրի ձայնը որոշիչ է». Սերժ Սարգսյանը Մարտունիում էր

Մայիսի 6-ին կայանալիք Ազգային ժողովի ընտրությունների նախընտրական քարոզարշավի շրջանակներում այսօր` ապրիլի 25-ին, Գեղարքունիքի մարզ էր այցելել ՀՀ նախագահ, Հայաստանի հանրապետական կուսակցության նախագահ և պատգամավորության թեկնածու Սերժ Սարգսյանը:

Վերջինս ՀՀԿ նախընտրական ծրագիրը նախ ներկայացրեց վարդենիսցի ընտրողներին: Իսկ Մարտունու տարածաշրջանի մեծ մասն ընդգրկող թիվ 24 ընտրատարածքում նախագահի առաջին հանդիպումը Վարդենիկ համայնքում էր, որտեղ նրան դիմավորեցին աղուհացով ու դհոլզուռնայով:

Վարդենիկցի ընտրողների հետ առկա խնդիրները քննարկելուց և իշխող կուսակցության տեսակետները ներկայացնելուց հետո Ս. Սարգսյանն ուղևորվեց Վաղաշեն: Նախագահը նախ եղավ գյուղի վերանորոգված մշակույթի պալատում, ծանոթացավ կատարված աշխատանքներին` իր դիտարկումները քննարկելով համայնքի ղեկավարի հետ:

Այնուհետ ՀՀԿ առաջնորդը հանդիպեց վաղաշենցի ընտրողների հետ` հարցուպատասխանի միջոցով ներկայացնելով իր տեսակետները մի շարք խնդիրների վերաբերյալ: Հայաստանյան գյուղերին բնորոշ համընդհանուր խնդիրներից զատ, այստեղ ամենաառաջնայիններից է դպրոցական շենքի հարցը. գործող դպրոցն անմխիթար վիճակում է, ամեն ժամ փլվելու վտանգը կա, իսկ արդեն 6-7 տարի կառուցվող նոր հանրակրթարանի շենքի շահագործումն էլ ուշանում է: Ճանապարհների վիճակն էլ հեռու է բավարար լինելուց: Իսկ գրեթե բոլոր համայնքներում էլ գյուղ. մթերքների իրացման, վարուցանքի և մեծաթիվ այլ սոցիալական խնդիրները համընդհանուր բնույթ են կրում:

Վաղաշենից ՀՀԿ առաջնորդն ուղևորվեց Մարտունի, որտեղ ևս նրան դիմավորեցին աղուհացով ու երգուպարով: 

Քաղաքի Մյասնիկյանի անվան հրապարակում կայացած հանրահավաքի ժամանակ, փաստելով տարածքային անհամաչափ զարգացման իրողությունը,Ս. Սարգսյանը նշեց, որ տարածքային անհամաչափությունները Հայաստանում շարունակում են մնալ սոցիալ-տնտեսական զարգացման լուրջ խոչընդոտ: «Երևանն այսօր, իրոք, գերծանրաբեռնված է և գերծանրաբեռնված է ի հաշիվ այլ տարածքների: Այս իրավիճակը չի կարող նպաստել բարեկեցիկ երկիր ունենալու մեր նպատակների իրականացմանը»,- ասաց ՀՀԿ նախագահը` տեղեկացնելով, որ այս ուղությամբ տարբերակված հարկային վարչարարության, մարզերում աշխատատեղերի խրախուսման և այլ միջոցներով լուրջ փոփոխություններ են նախատեսում իրենց ծրագրում:

 Իսկ սոցիալական իրավիճակի փոփոխությունից առավել կարևոր է, ըստ Ս. Սարգսյանի, երկրում արդարության հաստատումը: «Մի բան կա, որի պակասը մարդիկ հանդուրժել պատրաստ չեն. խոսքը արդարության պակասի մասին է: Անարդարությունն առաջինն է, որ մարդկանց թևաթափ է անում, կոտրում նրանց սրտերը, հույսն ու հավատը: Ես ուզում եմ, որ մենք միավորենք մեր ջանքերը և մեր երկրում ամրապնդենք արդարությունը»,- ասաց նա: Իսկ այդ ջանքերի իրականցման համար, ըստ ՀՀԿ նախագահի, կարևոր փոփոխությունների անհրաժեշտություն կա: Իր ելույթում Ս. Սարգսյանն անդրադարձել է նաև իր ղեղավարած կուսակցության Սևանա լճի խնդիրների լուծմանն ուղղված ծրագրերին` տեղեկացնելով, մասնավորապես, որ 2012 թվականին կավարտվեն Գավառ, Մարտունի և Վարդենիս քաղաքներում մաքրման կայանների կառուցման աշխատանքները:

ՀՀԿ առաջնորդի հաջորդ հանդիպումը Ներքին Գետաշեն համայնքում էր: Այս գյուղի բնակիչներին հուզող գլխավոր հարցը գլխավոր հատակագծով հարևան Վերին Գետաշենին տրամադրված իրենց հողամասերի կարգավիճակի որոշումն էր: Սերժ Սարգսյանն ասաց, որ տեղյակ է ներքինգետաշենցիների հետ վարչապետի հանդիպուման և ձեռքբերված պայմանավորվածության մասին: «Ես էդ պայմանավորվածությունը հաստատում եմ: Էդտեղ խնդիր չկա` էդ հողերը ձերն են եղել, ձերն էլ լինելու են»,- ասաց հանրապետության նախագահը:

Բոլոր համայնքներում էլ Ս. Սարգսյանը կոչ էր անում ակտիվորեն մասնակցել ԱԺ ընտրություններին` նշելով, որ յուրաքանչյուր ընտրող պետք է վստահ լինի, որ իր ձայնը որոշիչ է:

Ի դեպ, ապրիլի 25-ին Մարտունի քաղաքում և տարածաշրջանի նշածս գյուղական համայնքներում Հանրապետական կուսակցության «Հավատանք, որ փոխենք» կարգախոսով դրոշների առատություն էր: ՀՀԿ կողմնակիցների քարոզչական դրոշակներն անգամ տրակտորների ու բեռնատարների վրա կարելի էր տեսնել: