«Լրագրողներ հանուն ապագայի» ՀԿ-ն ապրիլի 23 - ին «Մարտունի ԻնֆոՏանը» ներկայացրեց երկու նոր կայք` Irazek.am և Ditaket.am, որոնք մշակվել և ստեղծվել են «Իրազեկ ընտրող» ծրագրի շրջանակներում:
Շնորհանդես-քննարկմանը ներկա էին մեծաթիվ երիտասարդներ, այդ թվում` ուսանողներ, առաջին անգամ ընտրողներ, դիտորդներ, տեղամասային ընտրական հանձնաժողովների անդամներ, քաղաքական կուսակցությունների տեղական կառույցների ներկայացուցիչներ, քաղաքացիական լրագրողներ, հասարակության այլ ակտիվ անդամներ:
Սուրեն Դեհերյանն ու ծրագրի համակարգող Անուշիկ Ավետյանը ըստ բաժինների ներկայացրեցին 2 կայքերն ու դրանցից օգտվելու համապատասխան «գործիքները», պատասխանեցին ներկաների հարցերին:
Irazek.am կայքը հարթակ է, որտեղ ընտրելու իրավունք ունեցող ՀՀ քաղաքացին կարող է պարզ, մատչելի լեզվով օգտակար տեղեկատվություն ստանալ ընտրողի իրավունքի և ընտրությունների ընթացքի վերաբերյալ, տեղեկանալ սեփական ընտրատեղամասի և այդ տեղամասում առաջադրված թեկնածուների մասին:
«Դարձիր մասնակից» բաժնում գրանցվելով` ՀՀ քաղաքացին դառնում է Իրազեկի ներկայացուցիչը իր համայնքում և ֆլեշմոբերի միջոցով ձևավորում ընտրությունների մասնակցության նոր մշակույթ:
«Պատմիր տեսածդ» բաժնի միջոցով էլ քաղաքացին հաղորդագրություն է թողնում սեփական համայնքում ընտրություններին առնչվող իրադարձությունների վերաբերյալ:
Կայքի հեղինակներն ակտիվ լուսաբանում են ինչպես իրենց մարզում խորհրդարանական ընտրությունների վերաբերյալ իրադարձությունները, այնպես էլ անդրադառնում են մարզերում առկա սոցիալական, բնապահպանական, առողջապահական և այլ ոլորտների խնդիրներին:"Իրազեկ ընտրող" ծրագիրը ԼՀԱ-ն իրականացնում է Հայաստանում ԱՄՆ դեսպանատան և ԵԱՀԿ Երևանի գրասենյակի աջակցությամբ:
Շնորհանդեսի վերջում ցուցադրվեց ԼՀԱ-ի պատրաստած «Ես ընտրում եմ, որ...» սոցիալական հոլովակը:
Շնորհանդեսի մասին տես նաև «Մարտունու կանանց համայնքային խորհուրդ» ՀԿ-ի իրականացրած ծրագրի շրջանակներում «Զանգակ» ՀԸ-ի պատրաստած տեսանյութում:
Комментариев нет:
Отправить комментарий