2012 թ. ապրիլի 18-ին հուշարձանների և տեսարժան վայրերի միջազգային օրվա հետ նշվում է նաև Համաշխարհային մշակութային և բնության ժառանգության պահպանության մասին կոնվենցիայի ընդունման 40-ամյակը, որն անցկացվում է «Համաշխարհային ժառանգություն» անվանումով: 1993 թ. սեպտեմբերի 5-ին Համաշխարհային ժառանգության պահպանության կոնվենցիան վավերացրած Հայաստանի Հանրապետությունում ևս այն նշվում է հուշարձանների, նրանց շրջակա տարածքների մաքրությանն ու բարեկարգմանն ուղղված տարբեր ձեռնարկներով, դասախոսություններով, ցուցահանդեսներով և այլ միջոցառումներով, որոնց մասնակցում են հասարակության տարբեր շերտերը:
Մարտունի քաղաքում, օրինակ, Տիգրան Աբրահամյանի անվան ավագ դպրոցի սաներին էին միացել ազատամարտիկները: Դպրոցականները մաքրեցին քաղաքի կենտրոնում գտնվող հուշարձանների տարածքները, իսկ ազատամարտիկները` քաղաքի արվարձանում գտնվող Սուրբ Գևորգ մատուռի շրջակայքը:
Իսկ պատմական հուշարձաններով հարուստ Գեղարքունիքի մարզում, ինչպեսև ողջ հանրապետությունում, ըստ պատմական միջավայրի պահպանության մարզային ծառայության պետ Գոռ Գասպարյանի, նմանատիպ միջոցառումներ ոչ միայն հիշարժան օրվա խորհրդով է պետք կազմակերպել, այլ` ողջ տարվա ընթացքում, ինչին էլ ուղղված է ծառայության և հանրային տարբեր կառույցների միջև ստեղծված համագործակցությունը:
Պատմական հուշարձանների և նրանց շրջակա տարածքների հանդեպ հոգածությունն ամեն համայնքում չէ, որ պատշաճ կերպով է արվում, ինչը մեզ հետ զրույցում նշեց նաև Գ. Գասպարյանը` նշելով, որ այսպիսի ձեռնարկները նաև հուշարձանների հանդեպ հանրային ուշադրության, հոգածության մթնոլորտի ձևավորմանը նպաստելուն են կոչված:
Комментариев нет:
Отправить комментарий